Kutujukan untuk anak2 Bongawan. Tetapi maksudnya luas, untuk urang kitani, urang Brunei...
Sandi Jua Eh….
Mun udah galangtugi belurisan
Kuyuk di kadai belulungan
Kelindahau di paya bamban berteraisan
Ayam di raban bekukukkan
Lapas subuh tu nah bilal udah mulih dari azan
Ya rabbi, anak kitani lakat lagi limpang-limpang
Meninggi udah matahari tidur inda sadar macam kan mati
Adeh mbari rasang hati ku…
Sandi jua eh…
Mun udah kan enjoy atu
Begambus kah begitar kah atau bekaraoke inda peduli tah
Pemudaan labih2 lagi urang tetua kitani indatah sadar diri
Tetinjak2 macam kuyuk tetalan belacan binsuluk
Tu nah nei pemudaan kitani lakat lagi main band kununnya rock tah tu
Mana lagi anu bedudukan siring2 jalan tangah2 malam
Merancangkan mencuri rambutan mun indapun ayam di raban
Pebinian kitani pun ia juanya melait AF sampai menangis
Inda sadar beratus usin top-up udah di bari arah si Ananda
Padahal kan membaiki tambak jalan mejarang pun inda beusin
Adeh mbari gali jua ku meliat…
Sandi jua eh…
Mun udah bedudukan di kadai siring jalan
Sampai ke tangah malam tapi segalas nganya kupinya
Indada lain tah dibincangkan, kan mengayuk saja kerajanya
Mengabiskan usin beliau yang anu jarih memutung gatah
Indada lain numbur saja diliati, palui banar anak kitani
Sampai cina di kadai udah pandai mbuka kadai malam2
Tu nah nei bugis mengarajakan tanah kitani, menanam sikui bepanas-panas
Memajak bagang kitani sampai dapat besidia ani mbali van, mbuat rumah
Alum lagi yang udah beusin kan mbali tanah kitani
Adeh, mbari cair budu ditelinga mendangar…
Sandi jua eh…
Mun sudah kan disabut kebilangan kitani
Ambuk di kuburan pun malas udah kan mendangar
Inda jua tah sadar2 besikitani sampai karang ani
Lakat lagi anak bini-bini kitani menaiki laki-laki
Sampai karing belitang di pauh
Sampai belingkarung buleh bebubut-bubut
Kebilangan Bongawan ani sampai ke TV
Cerita anu kan mbari mati
Adeh…mbari rasang hatiku…
Mbari cair budu ditelinga mendangar…
Mbari gali ku meliat!
Sandi jua kau ani eh….hehehehe….
No comments:
Post a Comment